என் கவிதைகள்

இரண்டு மாடுகளும் ஒரு நாயும்

நிறைவாய் நடந்தது அம்மா திதி

பிண்டங்களில் அம்மா, பாட்டி, முப்பாட்டி

மூவரும் வாழ்த்துருண்டைகளாயிருந்தனர்

நாங்கள் நமஸ்கரித்து

ஆசீர்வாத நீரும் அரிசிகளும் தலையில் விழுந்தன

மூவரையும் கரையேற்றவேண்டும்

மாடுகள் அல்லது நீரோடை ஏற்கும்

மாடுகளைத் தேடி அலைந்தேன்

இரண்டு மாடுகள் கண்ணில் பட்டன

கூட ஒரு நாய்

சாஸ்திரங்கள் நாய்கள்

பிண்டங்களை உண்டால் பாவமென்கிறது

சிறிது தயங்கினேன்…

இளவயதில் நானொரு iconoclast

அந்த குணம் எட்டிப் பார்த்தது

பிண்டவாசனையில் மாடுகள் அருகில் வந்து

என் பைகளை நக்கின

பைரவனும் எதிரே பசியில்

அருகில் நாக்கை நீட்டியது

பசியாற்றுவதில் அம்மா

அன்னபூரணியாக இருப்பார்

வாழை இலைகளில் பிண்டங்களை வைத்தேன்

பசித்த அனைவரும் உண்டனர்

பாவம் சேர்ந்தது எனக்கு

பரவாயில்லை

நாளை காலை சந்தியின்போது

போக்கிக்கொள்கிறேன்